240               TESTAMENTS ENREGISTRÉS AU PARLEMENT DE PARIS            (480)
Item, au varlet de chevaulx du dit Jaques ycelle testaterresse laissa et donna soixante sept solz six deniers Tournois.
Item, au page du dit Jaques quarante cinq solz Tournois.
Item, elle laissa à sa suer, la femme Thomas de Nuilly, un annel d'or à une perle.
Item, la dicte testaterresse donna et laissa à Guillemete de Fay, dit Petite, pour unefoiz, vint livres Tournois.
Item, elle laissa à maistre Jehan Herault, pour prier Dieu pour elle, unze livres cinq solz Tournois.
Item, à frere Guillaume Boubant unze livres cinq solz Tournois.
Item, elle donna et laissa à Perrin du Hamel, son clerc, dix livres Tournois.
Item, à Simonnet le Queux mvii solz vi deniers Tournois.
Item, la dicte testaterresse volt et ordena que ses bonnes Heures soient données, et les laissa à donner à et parl'ordenance et conseil de maistre Jehan Herault, son confesseur dessus nommé, et du dit Jaques l'Em­pereur, son mary.
Item, à l'Ostel Dieu de Paris quatre livres dix solz Tournois, c'est assavoir, la moitié à la fabrique, et l'autre au linge du dit hostel.
Item, la dicte testaterresse ratifia, conferma et approuva, et par ce sien present testament appreuve, confermé et ratiffie au mieulx que faire peut, certaines lettres de grace mutuelle et don pareil, pieça pas­sées par la dicte testaterresse et par le dit Jaques l'un à l'autre, vou­lant et expressement consentant que les dictes lettres sur ce faictes vaillent, tiengnent et sortissent leur plain effect en tout leur contenu.
Pour toutes lesqueles choses dessus dictes et chascune d'icelles faire, parfaire, paier et distribuer, ordener, entériner, acomplir et mettre à execucion deue par la maniere et condicion dessus exprimées ycelle testaterresse fist, constitua, nomma, eslut et ordena ses executeurs et feaulx commissaires, le dit Jaques l'Empereur, son mary, Nicolas Pe­tit, Gaultier Petit, et maistre George l'Oe ; ausquelx ensemble, aux trois et aux deux d'eulx, dont le dit Jaques soit l'un tousjours, ycelle testa­terresse donna, bailla et octroya, des maintenant pour lors, plain po^